„Blessaður, og takk fyrir síðast!“ sagði brosmildur bariton við mig á æfinu einn daginn.
„Blessaður“ sagði ég og brosti á móti en gat ómögulega komið því fyrir mig hvar ég hafði séð þennan súkkulaðibrúna söngvara áður.
„Þú er bara kominn í stóru rullurnar?“ spurði hann mig með of miklum undrunartón; eins og ég hefði ekkert með stór hlutverk að gera.
„Jú, jú.“ svaraði ég um leið og ég reyndi að muna hvaðan ég þekkti þetta vöðvabúnt. „Hvað er annars að frétta af þér?“
„Við Hanna erum búin að gifta okkur!“ svaraði hann brosandi og sýndi mér gylltan giftingarhring á kaffibrúnum baugfingrinum.
„Til hamingju!“ sagði ég ekki bara til hans heldur líka til mín sem loksins var að fá minnið aftur.
„Hanna er ólétt!“ hélt hann áfram um leið og hann leit á afturhluta stúlkunnar úr búningadeildinni sem gekk fram hjá okkur í þessu. „Kominn 7 mánuði á leið!“
„Frábært! Kom hún með þér?“ spurði ég og fylgdi augnaráði hans eftir, bara svona fyrir kurteisissakir.
„Nei, hún treysti sér ekki í flugið“, svaraði hann. „Ég er bara einn á ferð! Eins og á sumarhátíðinni um árið!“
Lokins áttaði ég mig alveg á manninum. Við höfðum sungið saman nokkrum árum áður á óperuhátíð þar sem sýningarnar fóru fram undir berum himni. Þar hafði ég kynnst honum og unnustu hans, Hönnu. En ég mundi líka eftir öðru.
Allir söngvararnir höfðu sungið með litla hljóðnema í hársverðinum til þess að það heyrðist í þeim fram í öftustu röð. Hljóðnemarnir voru tengdir við senda sem við bárum undir belti og sendu allt sem við sungum og sögðum í lítið hljóðver sem síðan kveikti og slökkti á okkur eftir því hvort við vorum á sviðinu eða ekki. Á einni af lokaæfingunum fannst baritóninn ekki þegar hann átti að fara á sviðið. Það var því brugðið á það ráð að kveikja á sendinum hans til að finna út hvar hann væri.
Við fengum aldrei að vita hvar hann var en af hljóðunum að dæma sem bárust um hátala hljóðkerfisins var ljóst að hann var að gera eitthvað allt annað en að hita röddina upp fyrir æfinuna. Strákarnir í hljóðdeildinni slökktu auðvitað strax á stununum og öskrunum en hleruðu í hvelli alla aðra senda til að finna út hver ætti hina röddina sem borist hafði með í kerfið.
Feimin og hlédræg pólsk sópransöngkona átti hinn hljóðnemann. Hún heitir ekki Hanna!
maí 2024 M F V F F S S 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 -
Nýlegar færslur